حیدربابا ال چک بو ایشلریندن
دومان اردم ـه مکتوب

«ناله دن دیر نی کیم» زندان دا «افغان ائتدیییم»
«تار قووا»نین کئفینی بورنومدان قایتاریرام
«قیز قالاسی» نین باکیره لییینی قاناییر بورنومون اوجو-
- گؤینه ین کیمی
- «خان قیزی»نین کافه سینده...
اؤزله ییرم تبریزین ایچینده تبریزی گؤینه ییرم
قان قوسدورور «گؤزل باکی» نغمه سییله آشیق آغام مد بو گؤزللییی...
گؤزللیییندن اوتانیرام، گؤروب، سئومه دیییم قیزلارین
سئویب، گؤرمه دیییم قیزلارین فیس بوک صفحه سینده فیت چالیرام
داش آتیرام پنجره لرینه – سؤز آتیرام کامنت لرینه...
«فانتان لار باغی»نین یوخوسون گؤرورم
«دومان اردم»ین ساغلیغینا بورکولو گئجه لرده!
یاریم چتول گؤزلرینین آجیلیغینی ایچیرم دومانلی شاعیرلرین
اینجه لییینی مزه له نیرم «آهوو»نون جونو بارماقلارینین.
دوزوم قورتاریب بو گؤزللییی یئمه یه قارداش
بیر چیمدیک «جانی جانان دیله میش وئرمه مک اولماز اردم
نه نزاع ائیله یه لیم اول نه سنیندیر نه منیم!»
بؤلسه لر شاعیرلری، نه کربلایا فضولی چاتار
نه تبریزه زیبا!...
سن آخی قایادان هادیر اولساناااا
من شاهسئون ائللرینده «آوازه ی عشقیم بلند»
اؤرنه یین؛ کافتارلارا پای اولدو کربلادا فضولی قاغانین قوهونلوغو
«ناله ترکین قیلمازام نی تک»ـی سفئهله ییرم هله
ایشکنجه – اضطراب- و دار آغاج لارینین دیبینده سئویشمه هیجانی
تجاوز یوخوسو – دیکتاتور قورخوسو- لندن گؤزللییی
«بند بند کسیلیرم» یای گئجه لرینین یوخوسوزلوغونو قارداش!
نئوپان تخنه سینده یاتیرام
نهج البلاغه نی باش آلتی قویموشام
سئوگی نین نه یین کیمی بیر جاناوار اولدوغونا دوشونورم
ایندیجه شاه گؤلونون کاباب قوخوسو
«بولوار»ین آرمودو ایستیکان لاری
تبریز دیسکوولارینین جاز هاوالاری
شورابیلین ساحیل دوداقلاری
بیر عالمدی رویالاریمدا گل گؤره سن!...
بورنوندان تؤکولورم اورمونون
بوتون گؤل لره قان قایتاریرام بو گئجه
دوزلاغیندا خایاسینی کاباب ائدیرلر اورمونون
بوتون شاعیرلری کابابا دعوت ائت قاداسی
آچیق عاراق گتیرت طرلان دره سیندن
اورمونون ساغلیغینا – نوش اولسون دئنن...
***
من بوردا بورج اؤده ییرم شعره
حبسووو چکیرم کیبریت قوتوسوندا وطن شاعیری
شاعیرین وطنی...
قورخا- قورخا، اودقونا- اودقونا، جان وئره- وئره
هله ده عاشیقم، هله ده سئویرم دومانجیم
تکی قوزوو یئییم شاعیر؛
منه بیر چیمدیک دوز گؤندر
دوزوم قورتاریب...
***
بیر ده شهریارین هئیکلینین اؤنونده قاییشینی آچیب، برک باغلا
دیشینین دیبیندن چیخانی داغ لارا سؤیله
آلت انگینی بوش توت،
بیر الین جیبینده،
داماغیندا اوجوز بیر سیگارت،
ساکیت بیر کوچه بویو،
فیشدیریق چالا- چالا میزیلدا کی؛
حیدربابا؛ ال چک بو ایشلریندن...
سعید موغانلی
تبریزین مرکزی زیندانی، متادون بندی، بیرینجی اوتاق
15/4/91
+ نوشته شده توسط bahman nasirzade بهمن نصیرزاده در پنجشنبه دوم آذر 1391 و ساعت 22:55 |


Powered By
BLOGFA.COM