نئچه بایاتی
عزیزیم، بادا گئتدی
یئل ووردو بادا گئتدی
دوشمن بیر ایش ایشله دی
گنج عؤمروم بادا گئتدی
گؤیلر بولودلو قالدی
قوشلار اومودلی قالدی
آچاری یار بوینوندا
گؤنلوم کیلیدلی قالدی
آتیمیزی قوشالیم
داغی-داشی آشالیم
سن یاغیش اول، من بولوت
یاغارکن قووشالیم
فلكین ایشی دوشسون
آغزیندان دیشی دوشسون
اونوندا منیم كیمی
نامرده ایشی دوشسون
فلكین قهری منه
گلمیری رحمی منه
دولدورور غم باده سین
ایچیردیر زهری منه
فلكین داد الیندن
اولمادیم شاد الیندن
یاپیشایدیم یاخاندان
چكییدیم داد الیندن
سویا گئدهن ایگیدی،
ساچی مخمر تكیدی.
آللاه منی سو ائیله.
سو گؤزهللر یوكودو.
سو آخیر سامانلیقدان،
یول كئچیر قارانلیقدان.
چالیش یاخشیلیق ائله،
نه چیخار یامانلیقدان؟
سو تك چاغلارام سنسیز،
قارا باغلارام سنسیز.
گئجهلر صبحه كیمی،
درددن آغلارام سنسیز.
سو گلر آرخا، هارای!
تؤكولمز چارخا، هارای!
ایگید غربته دوشسه،
چاغیرار آرخا، هارای!
سو آخار، یئر یاش قالار،
داش زینداندا داش قالار.
اوغلو گئدهن آنانین،
گؤزلرینده یاش قالار
سویون بندینه قوربان،
یارین فندینه قوربان.
یار آتینی یهرلر،
سینه بندینه قوربان.
سو گلیر گیله ـ گیله
بولبوللر گلیر دیله.
یاریمی باغدا گؤردوم،
باتیبدیر قیزیل گوله.
سو گلر آخار، دویماز،
داغ ـ داشی یاخار، دویماز.
گؤزلریم یار گؤزونه،
اؤلونجه باخار، دویماز
ائلهدیمی سو یازدا،
آخار گئدهر سو یازدا.
من یاری گؤرمهمیشم،
كئچن یازدا، بو یازدا.
سودا یاندی…
اود یاندی، سودا یاندی.
دردیمی سویا دئدیم،
اود توتدو، اودا یاندی.
دوشن یئری…
آتلانیب، دوشن یئری.
گؤز یاشیم اودا دؤنوب،
یاندیرار دوشن یئری.
آلتیمدا كیلیم یاندی،
اود دوشدو، كیلیم یاندی.
بالا، بالا دئمكدهن،
آغیزیمدا دیلیم یاندی.
اوزهرلیك دانا ـ دانا،
اوجاغدان گؤتورسانا.
بالا ـ بالا دئمكدهن،
نظری بد اولانین،
گؤزلری اوددا یانا.
كؤینهیین گولو یانسین،
اود توتسون، گولو یانسین.
سنی مندهن ائدهنین،
آغزیندا دیلی یانسین.
اوجاغین اودو كئچدی،
یئل ووردو، اودو كئچدی.
نه باخیرسان آی اوغلان،
سئوگیلین بودو كئچدی.
